الموضوع باين من عنوانه
من كتر ما شفت بقيت بضحك على اى حاجة اصلى هعمل ايه؟
كنت الاول بتضايق وكنت فى حيرة اضحك ولا ابكى بس اتغير الحال بقيت بضحك على كل حاجة
مرة واحد صاحبى كان بيقولى انه مخنوق فقلتله من ايه ؟" وكنا راكبين المواصلات"
فقالى بص قدامك بصيت لقيت اللى كان قاللى انه بيحبها ادام راكبة وبتضحك مع واحد وعملت نفسها مش شايفاه مع انه كان ادامها
بس الموضوع ماضيقهوش اوى غير لما شاف ان اللى معاها وقاعد بيضحك معاها هو صاحبنا القديم اللى كان شاهد على الحكاية من 3 سنين تخيلوا صاحبنا اللى كان معانا ويعرف كل حاجة عننا لا ومش كدة كمان دة عمل نفسه ماشفناش ولا كأنه يعرفنا
ساعتها بصيت لصاحبى وخبطت على كتفه وضحكت وقولتله اضحك كفايه الناس تعبانه خلقة اصل هتعمل ايه ؟
هى دى الحقيقة واحنا مش فى مسلسل او فيلم احنا فى الدنيا
صاحبى بصلى كدة وابتسم ابتسامة صفرا وقاللى جملة من كلمتين (يالسخرية القدر) الكلمة دى مطلعتش من دماغى مش عارف ليه
يمكن علشان انا اصلا مخنوق من حاجات كتير بس الحمد لله ولا ايه؟
المهم قولتله انت اللى تملكه انك تدعى ربنا وتقول (حسبى الله ونعم الوكيل ) عليهم هما الاتنين طول الطريق وهو مبيقولش غير حسبى الله ونعم الوكيل بس مبيقولهاش كدة بيقولها وهو بيبتسم انا عارف ان الابتسامة دى وراها حزن يهز جبال لان انا اكتر واحد يحس بيه
اصله صاحبى الانتيم واللى بعتبره نفسى
وبعد ما روحت لقيت نفسى بضحك وبقول (يالسخرية القدر والدنيا) على العموم الحمد لله
ودة كله مكتوب ومتقدر واحنا اللى بنسوق فى الغلط عارفين ليه؟
فيه كلمة قالهالى اخويا لما كنت صغير ومفهمتهاش بس انا دلوقتى فهمتها "ان الغلط بيولد غلط" وان اللى غلط يتحمل نتيجة غلطه واظن ان صاحبى غلط لما اختارها من الاول
واخيرا فعلا (يالسخرية القدر)انتوا ايه رايكوا فى الموضوع دة ؟
9 comments:
ياااااااااااااااااااه
انا اعصابي فعلا تعبت ومش قادر اتخيل اللى بيحصل ..بس دي حقيقه ...
أحمد مش عارف اقولك ايه بس القصه دي علي قد ما هي محزنه الا انها لعبت باعصابي جامد....
صاحبي و البنت اللى كنت بـ......
وكمان يتجاهلونا....؟؟
احمد الدنيا ملانه ... بس عجبني اوي رد احمد عمر في الموضوع اللى فات لما قال اننا لازم نعيش الفترة بتاعت الكليه دي .. لان الدنيا مش هتسيبنا في حالنا ...
وكمان انا دلوقتي افتكرت كلام احمد عنتر لما كان عامل موضوع وبيقول فيه اصحاب من ورق
افتكرت واحد زميل من اللاسماعيليه قال وايه يعني يا عم؟؟
ما انا اكتشتفت ان انا ليا تلات اصحاب ورق ...قطعتهم وكملت طريقي ...
ياريت تخلي صاحبك يحذو نفس النهج ده...
موضوع مؤلم..ارجوووك فكها الموضوع الجاي:)
شكرا يا جرايحى
وادعيلى ان انا اكون مرتاح المرة الجاية ربنا يسهل يارب
الموضوع ده مؤثر جدا صعب اوى ان الواحد يشوف الشخص اللى بيحبه مع حد تانى واللى يضايق اكتر قله احساسهم بالحب ده وده راجع الى انها محبتش الشخص ده والى انه كان مجرد تسليه بس ده حرام علينا اننا نظلم الاخرين ونعلقهم بحلم ونرجع نصحيهم من الحلم ده بس كل اللى علينا نقول حسبى اللى ونعم الوكيل واكيد اللى بيعمل فى حد حاجه وحشه بتتردله (البر لا يبلى والشر لا يفنى والديان لايموت يابن أدم افعل ما شئت كماتدين تدان( NaNo NeVeR FoRgEt YoU
ابو سعيد
انا شفت الموضوع اول واحد ومرديتش ارد
انا قلتلك مبحبش الحزن دة
وفيها اية يا عم
ماهو ممكن هوة بيحبها فعلا وهى بتحبة فعلا
بس كان المفروض جة استئذن من صاحبكم دة
انتت متفرجتش على فيلم سهر الليالاى ولا اية
يابو سعيد الدنيا مليانة حاجت كتير اوى
وعمرها ما هتقف على حد خسرناه فى طريقنا
لازم تفهم كدة كويس علشان تعرف تعيش حياتك مرتاح
دة ردى
حبيبك عمر
ومش هرد تانى الا لو موضوع مش حزين
سلام يا عمى
ههههههههههههههههههههههههههههههههه
تعرف انى مش شايف حاجة غلط يا سعيد
اتنين كانوا بيحبوا بعض
ما اتوفقوش مع بعض سابوا بعض
اتوفقت البنت مع حد تاني مهما كانت صلته بالاخر بقي
مش معني كدا انه ما يحبهاش علشان خاطر صاحبه هما ما بيعملوش حاجة غلط او حرام انهم حبوا بعض
الغلط الوحيد انهم اتجاهلوكوا بس يمكن خوف على مشاعركوا يمكن الصورة مش واضحة ليا بس اعتقد وجهه نظري واضحة
تشي
اولا شكرا يا نونا على ردك
وانا مقدر كلامك وفعلا كما تدين تدان
شكرا يا عمر على ردك
ومعلش يا سيدى ان شاء الله الموضوع الجاى هيعجبك
بس انت لازم تعرف ان صاحبك متاثر شويه وشكرا
بص يا جيفارا
انا مقولتش ما يحيبوش بعض بس انا شايف ان فيه خيانة حط نفسك مكانه وشوف رد فعلك ايه وعلى العموم الاختلاف فى الراى لايفسد للود قضية
وعموما شكرا على ردك اوى يا تشى
سعيد انا معاك انه غلط انهم لو شافوه و طنشوه يبقي مايستحقوش انه يعرفهم اصلا
بس
سلامي
Post a Comment