هل الحب حرام؟؟؟

أوقات كتير بفكر مع نفسى فى حاجات غريبة والمرة دى فكرت فى الحب بس يا خسارة
موصلتش لحاجة علشان
انا فكرت وسالت نفسى هل الحب حلال ولا حرام ؟

هل العلاقة بين الرجل والمرأة حلال ولا حرام؟

انا مش عالم من العلماء ولا داعية فى الدين بس انا عايز اعرف الحقيقة
عارفين حقيقة ايه ؟ حقيقة اللى الشباب فيه انا شايف ان فيه ناس كتير بتحب من جيلنا بس الكلام دة صح ولا غلط
انا كل ما اسمع داعية فى حكاية الحب دة الاقيه بيناقض نفسه مرة يجزم انه حرام ومرة تانية تكون حلال
حتى علماء الدين منقسمين فى الموضوع دة مرة اشوف واحد بيقول حلال وواحد تانى بيقول حرام
انا اتلخبطت لدرجة انى مابقيتش عارف الصح من الغلط
من ايام استضافوا واحد فى قناة المحور قال كلام غريب جدا قال ان اول نظرة مش حرام طيب ماشى كلنا عارفين كدة بس استعجبت لما قال ان اول بوسة حلال ودة لما اتنين فى طريقهم لبداية علاقة هههههههههههه(كلام فارغ)كله هبل
ويبرر موقفه بان الزواج بقى صعب( يظهر انه عايز يتعالج نفسيا)
المهم فى الاخر برضه موصلتش لحل ولا عرفت الحرام من الحلال
انا كل اللى انا عايزه ان لو واحد فيكم سمع اى حاجة عن الموضوع دة يقولى او له راى ميتكسفش ويقول يمكن اوصل وتوصلوا معايا لحل

يالسخرية القدر!!!! والدنيا

الموضوع باين من عنوانه

من كتر ما شفت بقيت بضحك على اى حاجة اصلى هعمل ايه؟

كنت الاول بتضايق وكنت فى حيرة اضحك ولا ابكى بس اتغير الحال بقيت بضحك على كل حاجة

مرة واحد صاحبى كان بيقولى انه مخنوق فقلتله من ايه ؟" وكنا راكبين المواصلات"

فقالى بص قدامك بصيت لقيت اللى كان قاللى انه بيحبها ادام راكبة وبتضحك مع واحد وعملت نفسها مش شايفاه مع انه كان ادامها

بس الموضوع ماضيقهوش اوى غير لما شاف ان اللى معاها وقاعد بيضحك معاها هو صاحبنا القديم اللى كان شاهد على الحكاية من 3 سنين تخيلوا صاحبنا اللى كان معانا ويعرف كل حاجة عننا لا ومش كدة كمان دة عمل نفسه ماشفناش ولا كأنه يعرفنا

ساعتها بصيت لصاحبى وخبطت على كتفه وضحكت وقولتله اضحك كفايه الناس تعبانه خلقة اصل هتعمل ايه ؟

هى دى الحقيقة واحنا مش فى مسلسل او فيلم احنا فى الدنيا

صاحبى بصلى كدة وابتسم ابتسامة صفرا وقاللى جملة من كلمتين (يالسخرية القدر) الكلمة دى مطلعتش من دماغى مش عارف ليه

يمكن علشان انا اصلا مخنوق من حاجات كتير بس الحمد لله ولا ايه؟

المهم قولتله انت اللى تملكه انك تدعى ربنا وتقول (حسبى الله ونعم الوكيل ) عليهم هما الاتنين طول الطريق وهو مبيقولش غير حسبى الله ونعم الوكيل بس مبيقولهاش كدة بيقولها وهو بيبتسم انا عارف ان الابتسامة دى وراها حزن يهز جبال لان انا اكتر واحد يحس بيه

اصله صاحبى الانتيم واللى بعتبره نفسى

وبعد ما روحت لقيت نفسى بضحك وبقول (يالسخرية القدر والدنيا) على العموم الحمد لله

ودة كله مكتوب ومتقدر واحنا اللى بنسوق فى الغلط عارفين ليه؟

فيه كلمة قالهالى اخويا لما كنت صغير ومفهمتهاش بس انا دلوقتى فهمتها "ان الغلط بيولد غلط" وان اللى غلط يتحمل نتيجة غلطه واظن ان صاحبى غلط لما اختارها من الاول

واخيرا فعلا (يالسخرية القدر)انتوا ايه رايكوا فى الموضوع دة ؟

الغلط فى مين؟؟؟؟!!!!

من ساعة مااتولدت او بمعنى اصح من ساعة ما وعيت على دنيا و الدنيا بتمشى معايا العكس انا كنت زمان بسمع كلام الناس وهما بيقولوا" يوم ليك ويوم عليك" لكن اعتقد ان انا الوحيد اللى حس بمعنى كلمة يوم عليك وعمرى ماشفت ولا حسيت بمعنى يوم ليك حتى لما كنت بفرح كنت حاسس جوايا ان الفرح دة مش هيكمل انا مش هنسى يوم كنت مع واحد صاحبى واحنا رايحين الكلية وقلتله انا مش متفائل وحتى كمان جبت اللاب توب علشان حاسس انى هتخنق واعد لوحدى عارفين حصل ايه اليوم دة؟

كان يوم جميل جدا يمكن اقدر اقول عليه اليوم اللى حسيت انى رجعت فيه للحياة (الاعمار بيد الله)
انا بسأل بقى ليه دايما بتمشى العكس ؟ ليه لما اقول مش متفائل بيبقى اليوم حلو؟ ليه لما احس ان اليوم دة حلو يطلع وحش؟

اخيرا الحمد لله على كل شئ وحش او حلو

اللهم لك الحمد والشكر يارب

ياترى فى حد فيكم زيى ؟؟؟؟؟؟؟